The Weeping Meadow 2004
آغلار اوْتلاق
پوْلوْسون شاه اثری
آغلار اوْتلاق/2004/یؤنتمن: تئو آنجئلوْپوْلوْس/اوْیونچولار: الئکساندرا آیدینی، تالیا آرگیریوْ، جیوْرجوس آرمئنیس و.
آغلار اوْتلاق (علفزار گریان)
ایکینجی دونیا ساواشی‌نین سوْنوجوندا ائولریندن دیده‌رگین توشموش بیر سیرا یونانلی، ائدسادان یونانیستانا گیریش یاپیرلار. هئچ بیر عاییله‌سی اوْلمایان ائلئنی اوْنلارلا بیرگه‌دیر. ائلینی بؤیویوب، یاشی چوْخالیر. بیر یانلیش اوْلای سوْنوجودا حامیله اوْلور.
آغلار اوْتلاق آنجئلوْپوْلوْسون شاه اثری ساییلیر. بو فیلم بیر قادین اوْلموش قیزجیغازین کدرلری‌نین ریوایتی‌دیر. بیر قادین کی آنا اوْلور، اؤزو ایسته‌مه‌دیی اوشاقلاری‌نین وورغونونا چئوریلیر. نه‌قدر چالیشسا دا چاتا بیلمه‌ییر. بو فیلم دوْلودور غم ایله کدر هم ده اؤزلم‌له. بو فیلم، شاه اثرلر یؤنتمنی اوْلان پوْلوْسون شاه اثری ساییلیر. هر بیر سئریجینی اوْزونه حئیران ائدیر.
آنجئلوْپوْلوْسون سینئماسی گونوموزده‌کی سیرادان بیر سینئمالاردان داها فرقلی بیر سینئمادیر. بو اوْلاغان اوستو سینئما حاقدا نه‌قدر دایشساق دا یئنه سوْنوندا سؤزوموز قیسیر قالاجاق. گئرچکدن اوْنون اینجه‌صنعتدن تام آنلامی ایله بارینمیش سینیماسینی، سادجه دیلده آنلاتماق اوْلماز. صنعت دوْلو سینئما، بلکی دئمک اوْلار پوْلوْسدا سوْن دوراغینا چاتیر.
آغلار اوْتلاق آنجئلوْپوْلوْسون بیتمه‌میش اوچلویونون ایلک فیلمی‌دیر دئمک. بو فیلم ده، باشقا فیلم لرینه تای پوْلوْسون همئشه‌کی وورنوخمالاری‌نین گؤسترگه‌سی‌دیر. آنایورد، آنا توْرپاق، وطن دردی، اوزاقلیق و اؤزله‌مک، ساواش، چاتماماق، غم، کدر، ائیله‌جه، قاندیرمایا دوْغرو سوْنوجا وارا بیلمه‌ین دورتولر؛ دئمک اوْلار پوْلوْسون همئشه‌کی وورنوخمالاریندان ساییلالار. بو فیلمده ده گؤزلجه‌سینه بونلارا توْخونوب‌دور. بو اوزدن ایزله‌ییچینی درین دوشونجه‌لره دالدیرمایی باشارا بیلیب‌دیر یقین.
هر بیر پروْفوْشینال سینئماچی‌نین عؤمرونون ان گؤزل فیلم‌لریندن بیریسی ساییلان فیلم حاقدا دانیشماق حقیقتن چوْخ دا قوْلای ایش ساییلمیر. آخ اوْنسوزدا بو فیلمی ایزله‌ین سینئما حئیرانی یقین بو فیلم‌له آغلاییب هم ده بو فیلم‌له گولوب‌دور. بیزه تای وطن دردی و حسرتی ایله یاشایان توْپلوملارین اینسانلاری بلکی بو فیلم‌له یاشایالار دا. سورگونلوک دردی ایله فارسجاسی"همزاد پنداری" ده ائده‌لر بلکی.
هله ده ائلئنی‌نین سسینی لاپ ایچ قاتلاریندان ائشیتمک مومدور.
پوْلوْسون ثبت ائتدییی گؤرونتولر، یقین سئحر و جادو ایله چکیلمیش‌دیر. چونکی هر بیر ایزله‌ییچینی حئیرانجاسینا اؤزونه جذب ائدیب، اوْنون اورَکدن آلقیشلارینا سبب اوْلور. اوزاق نومالاردان چکیلمیش شات‌لار، فیلمین ایچه‌ریسینده اوْلان گیزلی کدری اینسانا چوْخ گوجلوجه‌سینه ایلقا ائدیری. فیلمین سئناریوْسو کدر و چتیلیک‌له قوْنوملانیر. اوزاقلیق و چاتماماق فیلمین تمل سؤزودور. بیر آنا بالالاری‌نین اوزاقلیق کدرینه دؤزمه‌لی، سئوگیلیسینی اونودمالی، هم ده هر شئی‌ییندن واز کئچمه‌لی اوْلور.
ائلئنی یونانین سیمگه‌سی‌دیر. دئمک اوْلار یونان همئشه پوْلوْسون ان تمل وورنوخمالاری‌نین بیریسی اوْلموشدور. بوردا ایسه ائلینی‌یه ، سوْنوجلانمامیش سئوگی، اوْغوللاریندان آیری دوشموش آنا، یونانین آجی طالعینی سیمگه‌سل اوْلاراق بیچیمله‌مکده‌دیر.
بورادا دنیز ایله سویون روْلو چوْخ اؤنملی دیر. سوکوت، حضور، بؤیوکلویوندن اوفوقلارا دایانمیش دنیز بیر ابدی و قورتارماز حضورو عکس ائتمکده‌دیر. فیلمین ده قالارغی اوْلایلاری ائله همین سویون اوزه‌رینده یوْخسا سویون یاخینلیغیندا، پوْلوْسون چوخ دیققتلی کامئراسینین اوْنونده چکیلیب ثبت اوْلور.
فیلمین قالارغی گؤرونتوسو آز دئییل. سویون اوزه‌رینده جنازه تؤره‌نی، ساللانمیش آغ پرده‌لر، آسیلمیش قوْیونلار، سویون اوزه‌رینده‌کی ائولر، بیر ده ائلئنی‌نین دنیز اوزه‌رینده آغلاماسی، هر بیر ایزله‌ییچی‌نین بدنینده‌کی توک‌لری بیز-بیز ائدیر.
پوْلوْسون فیلم‌لرینده موسیقی‌نین چوْخ اؤزل بیر یئری واردیر. بوردا موسیقی تکجه موسیقی دئییل؛ ائلینی کاریندروْنون دانیشان موسیقیایی سسی دیر. بو سسس پوْلوْسون بوتون فیلم‌لرینی روحساللاشدیریر. سماوی بیر وارلیغا چئوریلدیر. بئله‌جه دئییلمه‌میش سؤزلرین یئرینی دوْلدورور.
بو فیلمین ایزله‌مه‌سینی هر کسه تؤوصیه ائدیریک.
ح. م
درباره این سایت